Cakaj në mbrojtje të Thaçit e Veselit: Historia e UÇK-së s’mund të njolloset nga askush

23:58 | 5 Korrik 2020
Trina Galanxhi

Ministri në detyrë i Punëve të Jashtme të Shqipërisë Gent Cakaj ka shprehur bindjen e tij në pastërtinë e luftës së lavdishme të UÇK-së, duke kërkuar mbështetje të pakursyer nga i gjithë kombi shqiptar për presidentin Hashim Thaçi dhe kryetarin e PDK-së Kadri Veseli.

Ai në një postim në Facebook shkruan se kur vjen puna te pastërtia dhe drejtësia e Ushtrisë Çlirimtare të Kosovës nuk duhet të reagojmë si shumë parti, as si dy shtete, por si një komb.

“Historia e UÇK-së dhe e popullit shqiptar nuk mund të njolloset asnjëherë e nga askush! Ndaj, secili prej nesh, i bindur në pafajësinë e themeluesve të UÇK-së dhe vlerave të patjetërsueshme të saj, duhet të shprehë mbështetjen e pakursyer për dy çlirimtarët, Hashim Thaçi e Kadri Veseli”, ka shkruar ministri Cakaj./zyrtare/